حتى أنت

حتى أنت ياصاحبي مانتب على خبري

                     من يوم سافرت ماتنشد على أخباري

الشــــاهــد الـلـه بدونك ضايق صدري

                     يفز قـلبي إلـى مـن جابــك الـطـاري

يامن على شان حبك بعت أنا عــمري

                    من واهج الشوق جيت لشوفتك ساري

أسوق عمري غلى يوم الغلى مشري

                    وابــيــع كــل البشر واصيرلك شاري

ياواحة الشعر ليت اللي نسى شعري

                     يدري إن صوته رفيقي دوم باسفاري

يادمعة الشوق هلي شوق وانتــثري

                     خــلي هميل المشاعر يسقي أشعاري

أنا ذبحني غيابك وانت ماتــــدري

                      قلبك بعيد وعيونك تسكن أفكــــاري

انت ولاشفت فيك الشوق من بدري

                      شكيت من غيـبتك وانـت ولا داري