فتني

الله على اللي فتني بنظرة عيونه

                          يوم التف لي وصوبني بنظراته

نواعسه نجل والحجان مقرونه

                       من الليل رمشه سرق لونه ولمساته

العود لين وشعره يكسي امتونه

                      الخيزران انثنى بخصره وميلاته

صوت المطر في سواليفه وبشجونه

                      عذوبة الصوت في مزحه وكلماته

عليه ضحكه وبحة صوت مجنونه

                      ياويل قلبي على ضحكه وهمساته

من جد ياهل الهوى من جد مزيونه

                       والله ماشفت بعـيوني مثيـــلاته

يصد مني خجل خايف يشوفونه

                       من الدلع لامشى يقصر بخطواته

الحب ما يرحم العشـاق قانـونه

                        الحب لو تستره تفضحك لوعاته